ሐመርን ያውርዱ
ስምዓ ጽድቅ ያውርዱ
የወሩ የማኅበረ መልእክት
Tuesday, 24 November 2020 00:00
የተወደዳችሁ አንባብያን በዛሬው የቤተ አብርሃም ዓምድ ዝግጅታችን ይዘንላችሁ የቀረብነው በሰሜን አሜሪካ የሴንት ሊውስ ደብረ ናዝሬት ቅድስት ማርያም እና ቅዱስ ገብርኤል ቤተ ክርስቲያን አስተዳዳሪና የኦሃዮ ሀገረ ስብከት ዋና ጸሐፊ የሆኑትን መልአከ ገነት በለጠ ይረፉን ነው፡፡  በመንፈሳዊ አገልግሎት ከገጠር እስከ ከተማ፤ ከኢትዮጵያ እስከ አፍሪካ ፤ከአውሮፓ እስከ አሜሪካ በብዙ አድባራት በተለያየ ኃላፊነት ተመድበው ውጤታማ ሥራ ሠርተዋል፡፡ እኛም በ፳፻፲፫ ዓ.ም  ፴፱ኛው ዓለም አቀፍ  የሰበካ መንፈሳዊ ጉባኤ ላይ ሀገረ ስብከታቸውን ወክለው ኢትዮጵያ በመጡበት ጊዜ አግኝተናቸው ከልጅነት እስከ እውቀት ያላቸውን የሕይወት ተሞክሮ ( የሥራ ልምድ እንዲያካፍሉን የአብርሃም ቤት እንግዳ አድርገናቸዋል እነሆ፡- ስምዐ ጽድቅ ፦ በቅድሚያ ጥሪያችንን አክብረውና ለቃለ ምልልስ ፈቃደኛ ሆነው ስለተገኙልን በልዑል እግዚአብሔር ስም እናመሰግናለን ፡፡ መልአከ ገነት በለጠ ይረፉ ፦ እኔም አክብራችሁ ሐሳቤን እንድሰጥ የሕይወት ተሞክሮዬንም ለሌሎች እንዳካፍል ለቃለ ምልልስ ስለጋበዛችሁኝ አመሰግናለሁ የምሰጠውም ሐሳብ የሚጠቅም እንዲሆንልኝ እመኛለሁ፡፡
Tuesday, 24 November 2020 00:00
በሀገሪቱ ከመጣው ለውጥ ጋር ተከትሎ በተለያዩ ክልሎች ላይ ዘርፈ ብዙ ጥቃቶች ተፈጽመዋል፡፡ በሰው እና በንብረት ላይ ብዙ ጉዳት ደርሷል፤ብዙዎች የተወለዱበትን፣ ያደጉበትን እና የኖሩበትን አካባቢ ለቀው ተሰደዋል፡፡ ብዙዎች ሕይወታቸውን አጥተዋል፣ ብዙ የነበራቸው ባንድ ጀንበር ንብረት አልባ ሁዋል፡፡ ለዚህ መሰሉ ጥቃት ከተጋለጡት ውስጥ ደግሞ አንደኛዋ ቅድስት ቤተ ክርስቲያን ናት፡፡ መንግሥት በተለዋወጠ እና ሀገሪቱ ላይ አንድ ነገር በተከሠተ ቊጥር ግንባር ቀደም የጥቃት ዒላማ የምትሆነው ቅድስት ቤተ ክርስቲያን ናት፡፡ ለዚህ ደግሞ ወደ ኋላ ሄዶ የመንግሥት ለውጥ ታሪካችንን ማየቱ በቂ ነው፡፡ ከሁለት ዓመት በፊት በነበረው የመንግሥት ለውጥ ጋር ተያይዞ ቤተ ክርስቲያን ብዙ መከራን አሳልፋለች፡፡ በእሳቱ ውስጥ ካለፉ ሀገረ ስብከቶች ውስጥ ደግሞ አንዱ የምሥራቅ ሀረርጌ ሀገረ ስብከት ነው፡፡ በወቅቱ የደረሰውን የቤተ ክርስቲያን ጥቃትና መሰል ጉዳዮች ዙሪያ የሀገረ ስብከቱን ዋና ሥራ አስኪያጅ እንደሚከተለው አነጋግረናል ይከታተሉን፡፡   ስምዐ ጽድቅ ፦  አባታችን ይህን ቃለ መጠይቅ እንድናደርግ ስለፈቀዱልን በእግዚአብሔር ስም እናመሰግናለን፡፡  በቅድሚያ ሙሉ ስምዎትን ከየት እንደመጡና የአገልግሎት ድርሻዎትን ይግለፁልን መልአከ ገነት ቀሲስ መልአኩ ደሳለኝ፦ እኔም እድሉን ስለሰጣችሁኝና እንድናገር ስለፈቀዳችሁልኝ በእግዚአብሔር ስም አመሰግናለሁ፡፡ መልአከ ገነት ቀሲስ መልአኩ ደሳለኝ እባላለሁ፡፡ የመጣሁት ከምሥራቅ ሐረርጌ ሀገረ ስብከት ሲሆን የአገልግሎት ድርሻዬም በኢትዮጵያ ኦርቶዶክስ ቤተ ክርስቲያን የምሥራቅ ሐረርጌ ሀገረ ስብከት ሥራ አስኪያጅ ነኝ፡፡ 
Tuesday, 24 November 2020 00:00
ይሄ ማኅበራዊ ሚዲያ የሚባል ጉድ የስንቱን ጠባይ፣ፍላጎትና ገበና ገለጠው?! ሰው እንዴት ከልብሱ አልፎ ገላውን፣ ከገላው አልፎ ነፍሱን አራቁቶ ያሳያል?! ጎበዞች ሆይ! ማኅበራዊ ሚዲያ ሰዎች ክብራቸው በነውራቸው እንዲሆን የመፍቀድ ልምምዳቸው ማሳያ አደባባይ እየሆነ መምጣቱን እንደ እኔ አስተውላችሁ ይሆን! ሞራል፣ ሥነ ምግባር፣ ሕግ በይፋ ሲሰባበሩ የሚታይብት የፍልሚያ ሜዳ አይታያችሁም? ማኅበራዊ ሚዲያ የሚያሳየን የሁሉንም ገመና ሆኗል፤ የሴቱን ብቻ አይደለም፤ የወንዱንም ነው፤ የደቂቁን ብቻ አይደለም የልሂቁንም ነው፤ የኢ-አማኒውን ብቻ አይደለም የምእመኑንም ነው፤ ያልተማረውን ብቻ አይደለም የተማረውንም ነው፡፡ እረ ስንቱን! በየቤቱ ቤተሰብ የቻለው ጉድ አሁን የሁሉም ሕዝብ ሆኖ ማኅበረሰብ እንዲሸከመው ሆኗል፡፡ አሁን በቤተሰብህ ብቻ ሳይሆን በጎረቤትህ አመል ትታወካለህ፡፡ ይሄ ጉድ ሄዶ ሄዶ ከቤተክርስቲያን ቄሱን፣ ዲያቆኑን፤ ከገዳም መነኮሳቱን መንካቱ ደግሞ ‹‹የቤቴው ጉድ›› እንድል አስገድዶኛል፡፡ የዛሬም ትዝብቴ ከብዙ ኃላፊነት ተሰምቷቸው የእግዚአብሔርን አደራ ጠብቀው ቀን ከሌት ስለሕዝባቸው በመንፈስ ሲጋደሉ ከሚኖሩ ካህናት ተርታ ወጥተው ‹‹አክቲቪስት›› ስለሆኑ ጥቂት ካህናት ነው፡፡ ሌት ከቀን በማኅበራዊ ሚዲያ ዕድሎቻቸው መልካሙን ዜና ከሚያወሩና ከሚነግሩን ብርቱ አገልጋይ መምህራን ይልቅ ጥቂት ‹‹አክቲቪስት›› ስለተባሉ አገልጋዮች ነው፡፡ 
Friday, 06 November 2020 00:00
ውድ አንባብያን ባለፈው ትምህርታችን የመስም ቅጽልና የመድበል ቅጽልን ምንነት ተምረናል። የቤት ሥራም መስጠታችን ይታወሳል። እናንተም እንደሠራችሁት ተስፋ እናደርጋለን። ለማረጋገጥ በሚከተለው መንገድ መልሱን እናስቀምጣለን። ተ.ቁ ግስ መስም ሳድስ ቅጽል መስም  ሣልስ ቅጽል መድበል ቅጽል ፩ ከሠተ መክሥት   ከሠት ፪ ተለወ መትልው   ተለውት ፫ ተንበለ መተንብል   ተንበልት ፬ ነበረ መንብር   ነበርት ፭ ሜጠ መመይጥ   መየጥ ፮ ሰፈነ መስፍን መስፈኒ ሰፈንት ፯ ነገደ መንግድ   ነገድ ውድ አንባብያን መልሱን በዚህ መልክ ከሠራችሁት ጥሩ ሠርታችኋል። በዚህ ዕትማችን ደግሞ ስለ ወገን ቅጽልና ስለ አኀዝ ቅጽል እንመለከታለን።ማስታወሻ አንዳንድ ግሶች መስም ሳድስ ቅጽል እንጅ መስም ሣልስ ቅጽል ላይኖራቸው ይችላል። ለምሳሌ የቀተለ መስም ሳድስ ቅጽሉ መቅትል መስም ሣልስ ቅጽሉ መቅተሊ ይሆናል። ጠበ የሚለው ግስ መስም ሳድስ  ቅጽሉ መጥብብ ሲሆን መስም ሣልስ ቅጽሉ ደግሞ መጥበቢ  ይሆናል። የጸንዐ ደግሞ መስም ሣልስ ቅጽሉ መጽንዒ ይሆናል። ስለዚህ ከላይ የተዘረዘሩት ግሶች መስም ሣልስ ቅጽል ያልተጻፈላቸው በመጽሐፍ የማይገኝላቸው ስለሆነ ነው። ወገን ቅጽል ይህ የቅጽል ዓይነት ወገንነትን፣ ዝምድናን የሚያመለክት ሲሆን በሀገር ስም ላይ ለተባዕታይ ጾታ ዊ/ ይ እና ለአንስታይ ጾታ ደግሞ ዊት/ ይት በመጨመር ይመሠረታል። ይህን በተመለከተ መምህር ዕንባቆም የግእዝ ቋንቋ የሰዋስው መጽሐፍ ለተማሪዎች በልዩ አቀራረብ የተዘጋጀ በተሰኘ መጽሐፋቸው ገጽ ፸ ላይ “ወገን ቅጽል ማለት አባትነትን፣ ወገንነትን፣ ጎሳነትን የሚያሳይ ሲሆን የሀገርና የትውልድ ስሞች መድረሻ  ፊደላቸውን ራብዕ እያደረገ ምዕላድ ፊደላት “ዊ”፣ ”ዊት”፣ “ይ” ፣ “ይት” ን  በመጨመር የሚቀጸል ነው” በማለት ያስረዳሉ።  መምህር አስበ ድንግል ደግሞ ግእዝ ልሳነ ኢትዮጵያ በተሰኘ መጽሐፋቸው ገጽ ፴፫ ላይ ጾታ ቅጽል በማለት ይጠሩትና ሲያብራሩት ግን “ጾታ ቅጽል ማለት ወገን ቅጽል ማለት ነው። በስም ላይ አርፎ ወገንነትን የሚገልጽ ነው በመድረሻው ላይ፡-  ለነጠላ ወንድ “ዊ”፣ ለነጠላ ሴት  “ዊት”፣ ለብዙ ወንድ “ውያን”፣  ለብዙ ሴት “ውያት”  በቅጽልነት የሚገኝበት ነው። በማለት ጾታ ቅጽል ብለው የጠሩት ወገን ቅጽል ማለት እንደሆነ ያስረዳሉ።  የሁለቱም መምህራን ከስያሜ ያለፈ ልዩነት የለውም። በዚህም ወገን ቅጽል ማለት በስሞች ላይ “ዊ/ይ”፣ “ዊት/ ይት”  የሚሉ ምዕላዶችን በመቀጠል ዝምድናን የሚያስረዳ የቅጽል ዓይነት ነው። የተሻለ ግልጽ ለማድረግ በምሳሌ እንመልከተው። ተ.ቁ ስም መስም ሳድስ ቅጽል መስም  ሣልስ ቅጽል መድበል ቅጽል አንስታይ ብዙ ፩ ሰማይ ሰማያዊ ሰማያዊት ሰማያውያን ሰማያውያት ፪ ኢትዮጵያ ኢትዮጵያዊ ኢትዮጵያዊት ኢትዮጵያውያን ኢትዮጵያውያት ፫ ድኅር ደኃራዊ/ይ ደኃራዊት/ይት ደኃራውያን/ ይያን ደኃራውያት/ይያት ፬ ምድር ምድራዊ ምድራዊት ምድራውያን ምድራውያት ፭ ግብፅ ግብፃዊ ግብፃዊት ግብፃውያን ግብፃውያት አኀዝ ቅጽል አኀዝ ቅጽል የሚባለው ቁጥር ሲሆን የነገሮችንና የስሞችን መጠን ወይም ብዛት ለመለካት የሚያገለግል ነው። ይህ ቅጽል ለነገር፣ ለሰው ስሞች ሲሆን እና ለዕለታት ሲሆን የተለያየ ቅርጽ አለው።  ለምሳሌ፡- ለሰው ወይም ለነገር ሲሆን አሐዱ፣ ክልኤቱ፣ ሠለስቱ፣ ዐርባዕቱ፣ ኀመስቱ፣ ስድስቱ፣ ሰብዓቱ፣ ሰመንቱ፣ ተስዓቱ፣ ዐሠርቱ ዐሠርቱ ወአሐዱ፣ ዐሠርቱ ወክልኤቱ፣ ዐሠርቱ ወሠለስቱ፣ ዐሠርቱ  ወዐርባዕቱ፣ ዐሠርቱ ወኀመስቱ፣… እያለ ይገለጻል። ለዕለታት ሲሆን፡- አሚሩ፣ ሰኑዩ፣ ሠሉሱ፣ ረብዑ፣ ሐሙሱ፣ ሰዱሱ፣ ሰብዑኡ፣ ሰሙኑ፣ ተስዑ፣ ዐሥሩ ዐሥሩ ወአሚሩ፣ ዐሥሩ ወሰኑዩ፣ ዐሥሩ፣ ወሠሉሱ፣ ዐሥሩ ወረብዑ፣ ዐሥሩ ወሐሙሱ፣ … እያለ ይቀጥላል። በአጠቃላይ አኀዝ ቅጽል በነገሮች ስም፣ በሰዎች ስም፣ በዕለታት ላይ ወዘተ እየተጨመረ ብዛትን የሚያመለክት የቅጽል ዓይነት ነው።  ውድን አንባብያን ከላይ የቀረበው ትምህርት ግልጽ ከሆነ የቤት ሠራ እንስጣችሁ። ፩. ውድ አንባብያን በሚከተሉት ቃላት ወገን አመልካች ምዕላድን  በመጨመር በነጠላና በብዙ፣ በሴትና በወንድ ወገን አመልካች ቃላትን መሥርቱ። ተ.ቁ ስም መስም ሳድስ ቅጽል መስም  ሣልስ ቅጽል መድበል ቅጽል አንስታይ ብዙ ፩ ገሊላ         ፪ ቅድም         ፫ ሣልስ         ፬ ሀገር         ፭ ሐሳብ         ፪. ውድ አንባብያን የሚከተሉትን  ቁጥሮች ለዕለታት ሲሆን እንዴት መጠቀም እንደምንችል በፊደል በመጠቀም (አኀዝ ቅጽሎችን) መሥርቱ።  ፲፮፣ ፲፯፣ ፲፰፣ ፲፱፣ ፳፣ ፳፩፣ ፳፪፣ ፳፫፣ ፳፬፣ ፳፭፣ ፳፮፣ ፳፯፣ ፳፰፣ ፳፱፣ ፴  
Friday, 06 November 2020 00:00
ዶክተር ጆሲ ጄኮብ (ቀሲስ) በቅድስት ሥላሴ መንፈሳዊ ኮሌጅ ውስጥ ለአሥራ ስድስት ዓመታት ያስተማሩ የሕንድ የማላንካራ ኦርቶዶክስ ቤተ ክርስቲያን ካህንና መምህር ናቸው። መምህሩ ከኮሌጁ የመምህርነት አገልግሎታቸው በተጨማሪ እዚህ በቆዩባቸው ዓመታት በሁለቱ አኃት አብያተ ክርስቲያናት መካከል ያለው ግንኙነት እንዲጠነክርም በትጋት ሠርተዋል። ታዲያ ይህን ቆያታቸውን እና በኢትዮጵያ ያለውን ወቅታዊ ሁኔታ በማስመልከት Orthodoxy Cognate Page የተባለ ሚዲያ አጭር ቃለ መጠይቅ አድርጎላቸው ነበር። ዶክተሩ በቃለመጠይቁ ላይ በመንፈሳዊ ኮሌጁ የነበራቸውን የአሥራ ስድስት ዓመት ቆይታ እንዲህ ሲሉ ገልጸውታል፡- ‹‹ከሕንድ ማላንካራ ኦርቶዶክስ ቤተ ክርስቲያን በቅድስት ሥላሴ መንፈሳዊ ኮሌጅ ነገረ መለኮትን እንዳስተምር ወደ ኢትዮጵያ የተላኩት ጥቅምት ፳፰፣ ፲፱፻፺፮ ዓ.ም. ነበር። በዚያም ለ፲፮ ዓመታት ያክል ቆይቼ ወደ ማላንካራ ኦርቶዶክስ ቤተ ክርስቲያን የተመለስኩት በ፳፻፲፩ ዓ.ም. ነበር። በዚህም ብዙ ልምዶችን አግኝቼበታለሁ። ከተለያዩ ቦታዎች፣ ከተለያዩ የሥራ ዘርፎች፣ ከተለያዩ የሕይወት ዳራዎች ከሚመጡ ከብዙ ሰዎች ጋር ተገናኝቼአለሁ። ብዙ ተምሬአለሁ። እንደውም በኢትዮጵያ ‹መምህር ነበርኩ› ከምል ይልቅ ‹ተማሪ ነበርኩ› ብል ይቀለኛል።›› የኢትዮጵያ ኦርቶዶክስ ተዋሕዶ ቤተ ክርስቲያንን አስተምህሮ በተመለከተም ‹‹ውብ ነው›› ሲሉ ገልጸዋል፤ ‹‹የኢትዮጵያ ኦርቶዶክስ ተዋሕዶ ቤተ ክርስቲያን ነገረ መለኮት ውብ ነው። ነገር ግን በዓለም ላይ ብዙም አልታወቀም። ምክንያቱም የቤተ ክርስቲያኒቱ መጻሕፍት የተጻፉት በሀገር ውስጥ ቋንቋ፡ በተለይም በግእዝ ነው እንጂ በውጪ ቋንቋዎች አይደለም። ግእዝ በተለይም ከ12ኛው መቶ ክፍለ ዘመን በኋላ የመነጋገሪያ ቋንቋ አልነበረም። ብዙ የቤተ ክርስቲያኒቱ መጻሕፍት የሚገኙት ግን አሁንም በግእዝ ነው። ባሕሉ ራሱ የግእዝ ባሕል ነው።›› በቅድስት ሥላሴ በሚያስተምሩበት ጊዜ በኮሌጁ ማኅበረሰብ ‹‹ፋዘር ጆሲ›› በሚል አጠራር የሚታወቁት እኚህ መምህር በሀገራችን ስላለው ወቅታዊ አለመረጋጋትም ሲገልጹ ሕዝቡ በጣም ሰላማዊ እንደ ሆነና ችግሮችን እየፈጠሩ ያሉት አንድን ሕዝብ እንወክላለን የሚሉ ጽንፈኞች እንደ ሆኑም አብራርተዋል። ሀገሪቱ ባለፉት ዓመታት በምን ዓይነት መሪዎችና የአመራር ስልት እንደ ቆየች በጥቂቱ የገለጹት ዶክተር ጆሲ ኢትዮጵያን እንደ ሀገር በማቆሙና በመጠበቁ ረገድ የኢትዮጵያ ኦርቶዶክስ ተዋሕዶ ቤተ ክርስቲያን አስተዋጽኦ ቀላል እንዳልነበርም አጽንዖት ሰጥተው መስክረዋል። ሆኖም አሁን በሀገሪቱ ያሉ ጽንፈኞች ቤተ ክርስቲያንን አብዝተው መክሰሳቸውና ከብሔር ጋር ማያያዛቸው ቤተ ክርስቲያኒቱን ዋነኛ ተጠቂ እንዳደረጋትም አስረድተዋል። በተለያዩ አካባቢዎች የተከሰቱት የአብያተ ክርስቲያናት መቃጠልና የኦርቶዶክሳውያን መሠዋትም የጥቂት ጽንፈኞች የተሳሳተ የስብከት ፍረጃ ውጤት መሆኑን አብራርተዋል። ‹‹ቤተ ክርስቲያን ኩላዊት ናት እንጂ የአንድ ብሔር ብቻ አይደለችም›› ካሉ በኋላም ‹‹እባካችሁ ቤተ ክርስቲያን የኹሉም ናትና ከአንድ ብሔር ጋር ብቻ አታያይዟት›› ሲሉም መክረዋል።  
Friday, 06 November 2020 00:00
ናጎርኖ-ካራባኽ (Nagorno-Karabakh) በአርመንና በአዘርባጃን መካከል ለተከሰተው ጦርነት ምክንያት የሆነች አካባቢ ናት። አካባቢው በአዘርባጃን የአስተዳደር ወሰን ሥር ያለ ሲሆን፡ የሚኖሩበት ግን አርመናውያን ክርስቲያኖች ናቸው። በዚህ አካባቢ ላይ ውጥረትን ያነገሠው ቆየት ያለው ግጭት የተፈጠረው፡ የአካባቢው ነዋሪዎች ‹‹እኛ ዝርያችን አርመን፣ እምነታችንም ክርስትና ነውና ከማትመስለን ከአዘርባጃን ጋር አንኖርም›› በማለት የፈጠሩት እንቅስቃሴ ነበር። በዚህም ምክንያት ከ1981 ዓ.ም. አካባቢ ጀምሮ በኹለቱ ሀገራት መካከል ከፍተኛ ውጥረት ተከሰተ። በቀጣዮቹ ዓመታትም በአውዳሚ ጦርነት እርስ በእርሳቸው ተዋግተው ከባድ ዋጋን ከፈሉ። ከዚህ በኋላ የአካባቢው አማጽያን ራሳቸውን ‹‹የአርትሳክ ሪፐብሊክ (Republic of Artsak)›› በማለት ሰይመው ለአዘርባጃን መንግሥት ያላቸውን እምቢተኝነት ገፉበት። የናጎርኖ-ካራባኽ አማጽያን የሚባሉት እነዚህ ኃይሎች ዋና ዓላማቸው ከአርመኖች ጋር መዋሐድ ነበር። ከሰሙኑ እንደ አዲስ ያገረሸው ጦርነትም፡ የአዘርባጃን የራስ ገዝ ግዛቱን በኃይል ጠቅልላ ለመያዝ ያደረገችው ጥረት ነበር። በዚህም የራስ ገዙ ጦር የአዘርባጃንን ጥቃት ለመመከት የሚያደርገውን ጥረት የአርመን ጦር ሙሉ በሙሉ ስለ ደገፈው፡ ሁለቱ ሀገራት ወደ ሙሉ ጦርነት ለመግባት ተገድደዋል። አዘርባጃን ‹‹በግዛቴ ውስጥ በማያገባት ገብታ ወረራ ፈጽማብኛለች›› በማለት አርመንን ስትከስ፤ አርመንም ‹‹በናጎርኖ-ካራባክ ግዛት ውስጥ በሚገኙ አርመናውያን ላይ ከፍተኛ ጭቆናና በኃይል የመያዝ ግፍን እየፈጸመች ነው›› ስትል አዘርባጃንን ትከሳለች። በናጎርኖ ካራባክ የሚገኘው በአርመን ሐዋርያዊት ቤተ ክርስቲያን ሥር ያለው የመድኃኔዓለም ቤተ ክርስቲያን ባለፈው የፈረንጆቹ ወር በከባድ መሣሪያ ሊመታ የቻለውም በዚህ ሰሞንኛ ግጭት ምክንያት ነው። አርመን እንደ ገለጸችው፡- ይህ ጋዛንቼትሶትስ ካቴድራል (Ghazanchetsots Cathedral) በመባልም የሚታወቀው ይህ የመድኃኔዓለም ካቴድራል፡ በመጀመሪያ ጉልላቱ በከባድ መሣሪያ ተመታና በከፊል ፈረሰ። የውስጥ አካሉም በዚህ ጥቃት ጉዳት ደረሰበት። ሌሎች ዘገባዎችም አያይዘው ሕፃናትና ጎልማሶች በካቴድራሉ ውስጥ ተጠልለው እንደ ነበር ይገልጹና፡ በመጀመሪያው ጥቃት ማንም የተጎዳ እንዳልነበር ያክላሉ። ከብዙ ሰዓታት በኋላ ካቴድራሉ በድጋሚ ተመታ፤ በውስጡ የነበሩት ሁለት ራሺያውያን ጋዜጠኞችም በጥቃቱ ቆሰሉ። የአርመን የውጪ ጉዳይ ሚኒስቴር ሚንስትር ‹‹ጥቃቱ አውሬአዊ ወንጀልና ለሰው ልጅም ትልቅ ተግዳሮት ነው›› ሲሉ የገለጹ ሲሆን፡ የሃይማኖት ተቋማትን ዒላማ ማድረግ የጦርነት ወንጀል መሆኑንም አክለው ተናግረዋል። ሆኖም አዘርባጃን ታሪካዊ፣ ባሕላዊና በተለይም ሃይማኖታዊ ሕንጻዎችንና ሐውልቶችን ዒላማ እንደማታደርግ በመከላከያ ሚኒስትሯ በኩል በመግለጽ ጥቃቱን ክዳለች። በጥቃቱ ጊዜ እጅግ ተጨንቀው እንደ ነበር የገለጹት አባ እንድርያስ የተባሉ የካቴድራሉ ካህን ‹‹የውቡ ካቴድራላችን ግድግዳዎች የመፍረሳቸው ሕመም ይሰማኛል፤ ዛሬ እዚህ እየተከሰተ ስላለው ነገርና እናት መሬታቸውን እየጠበቁ ልጆቻችን እየሞቱ ዓለም ዝም የማለቷ ሕመምም ይሰማኛል›› ሲሉ መሪር ኀዘናቸውን ገልጸዋል። ሹሻ በተባለችው የግዛቱ ከተማ ውስጥ የሚገኘው ይህ ካቴድራል በአሥራ ዘጠነኛው መቶ ክፍለ ዘመን የታነጸ ሲሆን፡ በአውሮፓውያኑ አቆጣጠር በ1920ዓ.ም. አካባቢ በዘር ምክንያት በተነሣ ግጭት ጉዳት ደርሶበት የነበረ ሲሆን፡ በ1980ዎቹ ከነበሩት ግጭቶች በኋላም ታድሶ ነበር። የሁለቱ ሀገራት ግጭትና በካቴድራሉ ላይ የደረሰውም ጉዳት፡ ጦርነት እጅግ አውዳሚና ክፉ መሆኑን የሚያስተምር ነው። (ምንጭ፡- AP, AFP, Reuters)  

ማስታወቂያ