ይህም ስታጠኑ እንዲያጠኑ መንገር፣ ስትበሉ እንዲበሉ፣ ስትጠጡ እንዲጠጡ መጋበዝ እና ስትጫወቱ በሥርዓቱ ከእነርሱ ጋር መጫወት ይጠበቅባችኋል፡፡ ጓደኞቻችሁ ሲታመሙም ልታዝኑላቸው እና ለአስተማሪዎቻችሁ ነግራችሁ እንዲታከሙ ልትረዷቸው ያስፈልጋል፡፡ 

ነገር ግን መጣላት አያስፈልግም፡፡ ልጆች! አንዳንድ ሥርዓት የሌላቸው ሕፃናት ሰበብ እየፈለጉ ሊረብሷችሁ ይችላሉ፡፡ አብረዋችሁ ሲቀመጡም ደብተራችሁን በመውሰድ፤ በመቅደድ ወይንም በእርሳስ እና በእስክሪቢቶ በመሞነጫጨር ሊያናድዷችሁም ይችላሉ፡፡ ስትጫወቱ ተራችሁን ሊወስዱባችሁ ወይንም ገፍተው ሊጥሏችሁም ይችላሉ፤ ሆኖም እናንተ ለአስተማሪዎቻችሁ መንገር ነው እንጂ መጣላት ወይንም መስደብ የሰነፍ ልጅ ጠባይ ነው፡፡ እነዚያን ተማሪዎችም ተመክረው ጎበዝና ጥሩ ልጆች እንዲሆኑ ካደረጋችሁ እግዚአብሔር በእናንተ ደስ ይለዋል፤ ይወዳችኋልም፡፡  

ልጆች! አምላካችን እግዚአብሔር እርስ በርስ እንድንዋደድ ያዘዘን አብረን በፍቅር እንድንኖር ነው፤ ፍቅር ካለ ሁሉም ደስተኛ ይሆናልና፤ በቤትም ሆነ በትምህርት ቤት ከቤተሰቦቻችሁና ከአስተማሪዎቻችሁ ጋር  በደስታ ትውላላችሁ፤ ትኖራላችሁ፡፡ ሁላችንም ፍቅር ቢኖረን እግዚአብሔር ከእኛ ጋር ስለሚሆን በሽታ እንዳይዘን ይጠብቀናል፡፡ አሁን የመጣው መድኃኒት የሌለው የኮሮና በሽታ ወደ ሀገራችን አይገባም ነበር፡፡ ልጆች ራሳችሁን ለመከላከል በየዕለቱ ጭንብል ማድረግ ወይንም ከሰው በሁለት ሜትር ርቃችሁ በፍራቻ እንድትሄዱም አይደረግም ነበር፡፡ 

ስለዚህ ልጆች! እግዚአብሔር እኛን ከበሽታ ሁሉ ይጠብቀን ዘንድ ባልንጀራችንን ልንወድና እርስ በርስ ልንዋደድ ይገባል፡፡ ካልተዋደድን ግን እርሱ በእኛ ስለሚያዝንና ስለሚቆጣ ከበሽታም ሆነ ከችግር አይጠብቀንም፡፡ 

የእግዚአብሔር ጥበቃ እንዳይለየን በፍቅር እንኖር ዘንድ ፈጣሪያችንን ይርዳን፤ አሜን፡፡