ሰላም በጠፋባቸው በእነዚህ የታሪካችን ክፍሎች ሁሉ የኢትዮጵያ ኦርቶዶክስ ተዋሕዶ ቤተ ክርስቲያን ጉዳትም ቀላል የሚባል አልነበረም። እንዲያውም የመከራዎቹ ዋናዋ ገፈት ቀማሽ እርሷ፣ አገልጋዮቿና ምእመናኗ ነበሩ። በመሆኑም የሰላምን መልካም ጣዕምና የጦርነትን መራራነት በተግባርም ጭምር ታውቀዋለች። ስለዚህም የሰላምን አስፈላጊነት በአገልግሎቷ ሁሉ ትሰብካለች። ስለ ሀገር ሰላም ዘወትር ትጸልያለች። በጸሎት ብቻም ሳይሆን ድርሻዋን በተግባር በመወጣትም ዘወትር ግንባር ቀደም ናት። ብዙ አብያተ ክርስቲያናት በተቃጠሉባትና አገልጋይ ካህናቷና ምእመኖቿ በተሠዉበት ባለፉት ቅርብ ዓመታት እንኳን በተለያዩ ሀገር ዐቀፍ የሰላም ጉባኤያት ስለ ሰላም ሰብካለች። ልበ አምላክ ዳዊት ናባል የተባለውን የምስጉኗ የአቢግያ ባልን የማጥፋት ኀይል እያለው ‹‹በስሜም ሰላም በሉት›› ብሎ ብላቴኖችን የላከበት ከዚህ የቤተ ክርስቲያንና የቅዱሳን ባሕርይ የተነሣ ነው።

በሀገራችን እየተካሄደ ያለው ጦርነትም ቤተ ክርስቲያንንና እኛ ልጆቿን በእጅጉ የሚያሳስብ ነው። በዚህ ጦርነት ስለሚጠፉት ነፍሳትና ስለሚወድመው የሀገር ሀብት ማሰብ እጅግ ያስጨንቃል። ቤተ ክርስቲያን ዘወትር ስለ ሰላም ሰብካለች። ይህም ብቻ ሳይሆን በልጆቿ አማካይነት ይህ ጦርነት እንዳይመጣ በተግባርም ብዙ ደክማለች። አሁንም የበለጠ እልቂትና ውድመት ሳይከሰት ይህ ጦርነት በአጭሩ እንዲቋጭ ጸሎቷና ምኞቷ ነው። ይህንን ምኞቷንም ሁሉም አካላት እንዲጋሩላት ትፈልጋለች። የሀገራችን ዜጎች ሁሉ እንደ ገና በሰላምና በመተሳሰብ እንዲኖሩ፣ ምእመኖቿም ያለ ሥጋት ‹‹የሰላም አለቃ›› የተባለ አምላክን እንዲያመልኩ ትፈልጋለች። ለዚህም ደግሞ በየትኛውም ጽንፍ ያለ ወገን የመዝሙረኛውን ቃል በማስተዋል ‹‹በስሜም ሰላም በሉት›› እንደ ተባለ ሁሉም ‹‹ከክፉ ሸሽቶ መልካምንም አድርጎ›› ስለ ሰላም ፈጣሪውን እንዲጠይቅ፣ እርስ በራሱም ሰላም እንዲባባል ትሻለች። በኃጢአት የጎሰቆሉ ልጆቿ በንስሓ ወደ መልካሙ መንገድ ሳይመለሱ እንዳይጠፉ ዘወትር ትጸልያለች።

ወቅቱ የጾም እንደ መሆኑም ካለንበት የክፋት ዘመን ያወጣን ዘንድ ሁሉም ሰው በጾም፣ በጸሎትና በልቅሶ ወደ እግዚአብሔር ሊጮህ ይገባል። ስለ ጠፉት ነፍሳት፣ ስላሉት ወገኖች፣ ስለ ቤተ ክርስቲያን፣ ስለ ሀገርና በአጠቃላይ ስለ ሰላም ሁሉም በአንድነት ከጮኸ፡ እግዚአብሔር የምንዱባንን ጩኸት የሚሰማ አምላክ ነውና ወደ እኛ ይመለከታል። ‹‹ሰላምን እንደ ወንዝ፥ የአሕዛብንም ክብር እንደሚጐርፍ ፈሳሽ እመልስላታለሁ›› የሚል አምላክ ‹‹በጾምና በልቅሶ›› ወደ እርሱ ለሚመለሱ ሁሉ ፊቱን ሊመልስላቸው የታመነ ነው። እርስ በርሳችን ከመወቃቀስና ከመጠፋፋት ይልቅ ሰላምን ልንጠያየቅ፣ ወደ እርሱም በጾምና በልቅሶ ልንመለስ ይገባናል። (ኢሳ. ፷፮፡፲፪ ፣ ኢዩ.፪፡፲፪)።